«Pähim-paýhas ummany Magtymguly Pyragy» ýylynda ýurdumyzyň ähli künjeklerinde wagyz-nesihat, edebiýat duşuşyklaryna, halypa-şägirtlik söhbetlerine, sport ýaryşlaryna, umuman, medeni-köpçülik çärelerine giň gerim berilýär. Şu nukdaýnazardan Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşi tarapyndan geçirilýän çärelere hem uly orun degişlidir.
Golaýda Sakarçäge etrap häkimliginiň, Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşiniň şeýle hem etrabyň iri jemgyýetçilik guramalarynyň bilelikde gurnamagynda dabaraly maslahat geçirildi. Maslahata il sylagly ýaşulular, kümüş saçly eneler, jemgyýetçilik guramalarynyň wekilleri, etrabyň dürli edara-kärhanalarynda zähmet çekýän raýatlar, şeýle hem bagtyýar ýaşlar gatnaşdylar.
Dabarada çykyş edenler «Pähim-paýhas ummany Magtymguly Pyragy» ýylynyň dowam edýän şu günlerinde halkymyzyň bagtyýar zähmet çekýändigi, mynasyp dynç alýandygy dogrusynda söhbet etdiler. Şeýle hem akyldar şahyr Magtymguly Pyragynyň şygyrlarynyň terbiýeçilik ähmiýeti, olaryň ýaş nesliň wekillerine edep bermek babatda täsirli ýol-ýörelgedigini giňişleýin bellediler.
Şeýle hem ýurdumyzyň ähli welaýatlarynda Türkmenistanyň Halk Maslahatynyň nobatdaky mejlisine görülýän taýýarlyklar barada hem aýratyn bellendi. «Maslahatly biçilen don gysga bolmaz» diýip nygtaýan pederlerimiziň ýol-ýörelgeleriniň Berkarar döwletiň täze eýýamynyň Galkynyşy döwründe mynasyp dowam etdirilýändigi, «Pähim-paýhas ummany Magtymguly Pyragy» ýylynda Türkmenistanyň Halk Maslahatynyň geçirilmeginiň çuňňur many-mazmuna eýedigi baradaky söhbetler çäräniň dowamynda edilen çykyşlardan eriş-argaç bolup geçdi.
Buýsançly söhbetlerden soňra etrabyň medeniýet öýüniň aýdymçy-sazandalarynyň çykyşlaryna giň orun berildi. Ýaňlanan aýdymdyr-sazlarda, ýerine ýetirilen tanslarda berkarar döwletimiziň, bagtyýar zamanamyzyň waspy belentden ýetirildi. Magtymguly Pyraga bagyşlanyp ýerine ýetirilen sahna çykyşy hem örän täsirli boldy.
Dabaranyň ahyrynda oňa gatnaşanlar ýurdumyzy gülzarlyga, baky bagtyýarlyga öwren Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Merdan BEKMYRADOW,
TMÝG-niň Mary welaýatynyň
Sakarçäge etrap Geňeşiniň başlygy.
