Şu günler Ahal welaýatynda Medeniýet hepdeligi üstünlikli dowam edýär. 22-nji iýunda Ak bugdaý etrabynyň Nowruz ýaýlasyndaky «Türkmeniň ak öýi» binasynda dabaraly ýagdaýda badalga alan hepdeligiň çäginde baý many-mazmunly çäreler geçirilýär.
Nowruz ýaýlasyndaky «Türkmeniň ak öýi» binasynda geçirilen konsert ýakymly täsirlere beslendi. Owadan sahnadan ýaňlanan joşgunly aýdym-sazlar, halk döredijilik çykyşlary milli medeniýetimiziň we sungatymyzyň ösüşiniň beýanyna öwrüldi. Sungat çykyşlarynda Watanymyzyň beýik özgertmeleri, Arkadagly döwrümiz, asuda durmuşymyz, bagtyýar halkymyz, dost-doganlyk buýsançly waspyny tapdy. Şowhunly konsert göwün göteriji duýgulary döretdi.
Hepdeligiň çäginde dürli ugurly maslahatlar, sergiler, döredijilik duşuşyklary, täze sahna oýunlarynyň görkezilişi hem geçirilýär. Welaýatymyzyň medeniýet ojaklarynda ýörite meýilnama boýunça geçirilýän çärelere ýaşlar egsilmez şatlyk we buýsanç bilen gatnaşýarlar.
Güljemal ATDAÝEWA,
Türkmenistanyň Magtymguly adyndaky
Ýaşlar guramasynyň Ahal welaýat
Geňeşiniň hünärmeni.
