Tomus paslynyň dowam edýän şu günlerinde ýurdumyzyň ähli sebitlerinde ýerleşýän çagalar baglarynda terbiýelenýän körpeler öz wagtlaryny şadyýanlykda, wagtyhoşlukda geçirýärler.
Golaýda Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşi bilen etrabyň 4-nji çagalar bakja-bagynyň bilelikde guramagynda ady agzalan çagalar bakja-bagynda «Çagalaryň bagtyýarlygy – Watanymyzyň kuwwaty» atly aýdym-sazly çäre geçirildi. Çärä Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşiniň hünärmenleri bilen bir hatarda bu çagalar bakja-bagynda terbiýelenýän körpeler, terbiýeçiler we mugallymlar gatnaşdylar.
Şowhuna beslenen çärede körpe nesliň wekilleri gyzykly sahnalary, goşgulary, aýdym-sazlary ýerine ýetirdiler. Körpeleriň görkezen sahnalary olaryň bu çäre taýýarlykly gelendiklerini aýdyňlygy bilen görkezdi. Kalby buýsançdan doly çagalaryň ýerine ýetiren goşgulary bagtyýar zamanamyzyň waspy bolup ýaňlandy. Ýüreklerinde joşgun, gözlerinde şatlyk duýgulary uçganaklaýan körpejeler bagtyýar şygyrlaryň üsti bilen Berkarar döwletimiziň tarypyny belentden ýetirdiler.
Bagtly çagalygyň ýurduna öwrülen Watanymyzyň goýnunda geçirilen bu çärä gatnaşan çagalar gül Diýarymyza, Gahryman Arkadagymyza, Arkadagly Gahryman Serdarymyza bagyşlanyp döredilen aýdymlary hem ýerine ýetirdiler. Şat nesilleriň aýdymdyr sazlaryň sazlaşykly heňine goşulyp ýerine ýetiren tanslary çärä gatnaşanlara has-da täsirli pursatlary bagyş etdi.
Gyzykly geçen aýdym-sazly çäräniň dowamynda oňa gatnaşyjylar çagalaryň bagtly durmuşda ýaşamagy ugrunda döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Kerim ALTYÝEW,
TMÝG-niň Mary welaýatynyň Sakarçäge etrap Geňeşiniň guramaçylyk bölüminiň baş hünärmeni.
