Tomus paslynyň dowam edýän şu günlerinde çagalar baglarynda terbiýelenýän körpeleri bagtyýar ruhda terbiýelemek maksady bilen geçirilýän çäreler giň gerime eýe bolýar.
Golaýda ýaş nesilleri zähmetsöýerlik ruhunda terbiýelemek, olarda zähmet endiklerini kemala getirmek maksady bilen, Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşi bilen Sakarçäge etrabynyň 1-nji çagalar bakja-bagynyň bilelikde guramagynda «Zähmet terbiýesiniň gözbaşy» ady bilen bäsleşik geçirildi. Etrabyň 1-nji çagalar bakja-bagynda geçirilen bu çärä TMÝG-niň Mary welaýatynyň Sakarçäge etrap Geňeşiniň hünärmenleri, şol çagalar bakja-bagynyň terbiýeçileri we körpeleri gatnaşdylar.
Işjeň ýagdaýda geçen bäsleşigiň başynda terbiýeçiler körpelere oýunjaklaryň kömegi bilen birnäçe zähmet gurallaryny ýasamagy öwretdiler. Körpe nesiller öz hyýalynda döreden birnäçe şekilleri oýnawaç bölejikleriniň kömegi bilen düzmekligi öwrendiler. Soňra bagtyýar körpeler oýnawaçlaryň üsti bilen gündelik durmuşda ulanylýan zatlary ýasamak boýunça özara bäsleşdiler. Gyzykly ýagdaýda geçen ýaryşyň netijesinde üstünlik gazanan körpeleriň ýasan gurallary çagalaryň zähmet ukyplarynyň günsaýyn kämilleşýändigini we terbiýeçileriň bu ugurda alyp barýan işleriniň özüniň oňyn netijesini berýändigini aýdyňlygy bilen görkezdi.
Bäsleşigiň dowamynda oňa gatnaşyjylar çagalaryň ylymly-bilimli, giň dünýägaraýyşly, sagdyn pikirlenmäge ukyply, Watana wepaly nesilleri kemala getirmek ugrunda döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza alkyş sözlerini aýtdylar. Bäsleşikde ýeňiji bolan we işjeň gatnaşan körpeler TMÝG-niň Mary welaýatynyň Sakarçäge etrap Geňeşi tarapyndan Hormat hatlar bilen sylaglandylar.
Şeýle çäreleriň yzygiderli geçirilmegi ýaş nesilleri zähmetsöýerlik ruhunda terbiýelemek, olarda zähmet endiklerini kemala getirmek babatda möhüm ähmiýete eýedir.
Sona BABAJANOWA,
TMÝG-niň Mary welaýatynyň
Sakarçäge etrap Geňeşiniň uly buhgalteri.
