Ýakynda Ýolöten etrap häkimliginiň, TMÝG-niň etrap Geňeşiniň, etrap jemgyýetçilik guramalarynyň, etrap bilim bölüminiň bilelikde guramagynda Ýolöten şäherindäki «Ajaýyp agşam» toý mekanynda Milli bahar baýramy mynasybetli «Läle reýhan kylyp bütin barlyga – parahat ýurduma gelende Nowruz» atly aýdym-sazly baýramçylyk dabarasy geçirildi. Dabarada uly sergi ýaýbaňlandyrylyp, onda Gahryman Arkadagymyzyň, dana atamyz Magtymguly Pyragynyň ajaýyp kitaplary, gelin-gyzlarymyzyň el işleri, milli şaý-sepleri görkezildi.
Dabarada täsirli çykyşlara giň orun berildi. Çykyş edenler ýurdumyza bahar paslynyň gelmegi bilen tebigatyň ajaýyp keşbe girendigi, toýlary toýlara ulaşýan Watanymyzda Milli bahar baýramynyň ýokary ruhubelentlik bilen bellenilýändigini uly buýsanç bilen aýtdylar. Dabaranyň dowamynda ýerine ýetirilen aýdym-sazlardyr, tanslar oňa gatnaşyjylarda ýakymly täsir galdyrdy.
Dabaranyň ahyrynda oňa gatnaşanlaryň adyndan Gahryman Arkadagymyzyň, Arkadagly Gahryman Serdarymyzyň adyna alkyş sözleri belentden ýaňlandy.
Ahmet NURJANOW,
Türkmenistanyň Magtymguly adyndaky
Ýaşlar guramasynyň Mary welaýatynyň
Ýolöten etrap Geňeşiniň sanly ulgam
boýunça esasy hünärmeni.
