Bahar geldi sepip dünýä atyryn,
Täzelendi tutuş dünýäň görkü-de.
Ýakymly howasy hoştap säheriň,
Şeýlebir owadan ýazyň reňki-de.
Tawus guşuň owsun atýan ýelegi,
Ýatladyp dur görkün älemgoşaryň.
Sähram çümüp otyr üýtgeşik dünýä,
Köňüllere berip şatlyk açaryn.
Guş-gumrulaň owazyna höwrügip,
Gidip barýan synlap dag-y-düzleri.
Siňip gujagyna gülälekleriň,
Diňleýän bilbilleň täsin heňini.
Ýaz ýakymly duýgusyny paýlaýar,
Tebigata ýapyp ýaşyl donuny.
Ýüreklere ylham berip ak säher,
Çykardy al-sähra şahyr ogluny.
Baharda täzeden dogulýar ynsan,
Düşüp tämiz duýgularyň yşgyna.
Eý, meniň köňlümiň soltany bahar,
Ýaş goşýaň her maýda gelip ýaşyma.
EJE JAN
.jpg)
Saýrak guşlar sazy bilen buşdulap,
Owazyny diňläp ýürek joşdy has,
Ýetirdim men tarypyňy goşgulap,
Bahar saňa gül getirdi eje jan.
Ýylgyryşyň bezeg berýär ýazlara,
Ýürek tarym joşuberdi sazlara,
Barlygyňda dört pasylam ýaz maňa,
Bahar saňa gül getirdi eje jan.
Dünýäni dolduryp gül bilen sazdan,
Göwnüň ylham alýar joşgunly ýazdan,
Seň bilen bu günler owadan hasam,
Bahar saňa gül getirdi eje jan.
Läle ZAKIROWA,
Murgap etrap merkezi kitaphanasynyň
kitaphanaçysy, TMÝG-niň işjeň agzasy.
