Serdar şäherindäki “Dürdäne” çagalar sagaldyş we dynç alyş merkezinde welaýat Polisiýa müdirliginiň polisiýanyň ýol gözegçiligi bölüminiň, Serdar şäher, etrap polisiýa bölüminiň polisiýanyň ýol gözegçiligi bölümçesiniň we TMÝG-niň Balkan welaýatynyň Serdar şäher Geňeşiniň bilelikde guramaklarynda “Ýaş welosipedçi” atly bäsleşik geçirildi. Ýol-ulag hadysalarynyň öňüni almagy, ýaş nesillere sürüjileriň we pyýadalaryň borçlaryny düşündirmegi maksat edinen bäsleşige şol ýerde dynç alýan we saglygyny berkidýän çagalar gatnaşdylar. Olar bäsleşigiň şertlerine laýyklykda, emeli päsgelçilik döredilen ýerlerden welosipedli geçdiler. Ýol hereketiniň düzgünlerini doly we dogry berjaý etmekde ýol belgileriniň we ýol yşygyň ähmiýeti hakynda öwrenenlerini gürrüň berdiler. Ýol hereketiniň düzgünlerini düşündirýän suratlary asfaltyň ýüzüne çekmekde birek-birekden kem durmadylar. Bäsleşigiň ahyrynda ýol hereketiniň düzgünlerini düşündirmekde, ýollaryň hadysasyz bolmagyny wagyz etmekde üstünlikli çykyş eden körpelere we bäsleşige gatnaşyjylaryň hemmesine TMÝG-niň Balkan welaýatynyň Serdar şäher Geňeşiniň ýadygärlik sowgatlary gowşuryldy.
Oguljahan WELIÝEWA,
TMÝG-niň Balkan welaýatynyň Serdar şäher
Geňeşiniň guramaçylyk bölüminiň müdiri.
