Ýakynda Boldumsaz etrabynyň medeniýet öýünde Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde, dutarçy bagşy-sazandalaryň arasynda yglan edilen «Çalsana bagşy!» atly bäsleşigiň etrap tapgyry geçirildi. Bäsleşige etrabyň oba medeniýet öýleriniň ýaş höwesjeň bagşy-sazandalaryň 13 sanysy gatnaşdy.
Bäsleşige gatnaşyjy bagşy-sazandalaryň dutarda joşup, ýerine ýetiren aýdym-sazlary ildeşlerimizde ýakymly duýgulary döretdi. Aýdym-saz sungatynda tejribe toplan halypalardan ybarat eminler topary ýerine ýetirijileriň ukyp-başarnygyna, sahna medeniýetiniň sazlaşygyna, çalan sazlaryna we aýdymlaryň sözleriniň çeperçiligine mynasyp baha berdiler.
«Çalsana bagşy!» atly bäsleşigiň etrap tapgyry şowhunly geçirildi we onda öz ussatlygyny görkezen Gubadag şäher medeniýet merkeziniň ýaş höwesjeňi Şatlyk Tüýliýew, «Tommakýap» oba medeniýet öýüniň ýaş höwesjeňi Begenç Gazakow, «Gatyoý» oba medeniýet öýüniň ýaş höwesjeňi Pälwan Tagyýew, Gubadag şäher çagalar sungat mekdebiniň bagşy mugallymy Göwher Haýydowa, «Täze gala» oba medeniýet öýüniň ýaş höwesjeňi Süleýman Duşmedow, şeýle hem gowy netije görkezen sazanda «Weliýap» oba medeniýet öýüniň ýaş höwesjeňi Leýla Potjykowa dagylar üstünlikli çykyş edip, welaýat tapgyryna gatnaşmana hukuk gazandylar.
Bäsleşigiň ahyrynda ýeňijilere we işjeň gatnaşan ýaş bagşy-sazandalara etrap medeniýet bölüminiň hem-de Türkmenistanyň Magtymguly adyndaky Ýaşlar guramasynyň Boldumsaz etrap Geňeşiniň Hormat hatlary we ýadygärlik sowgatlary gowşuryldy.
Parahat SABIROW,
Türkmenistanyň Magtymguly adyndaky
Ýaşlar guramasynyň Daşoguz welaýatynyň
Boldumsaz etrap Geňeşiniň Gubadag
şäher bölümçesiniň baş hünärmeni.
