Malaýziýanyň Futbol Assosiasiýasy ýurduň milli ýygyndysynyň Türkmenistanyň milli ýygyndysy bilen ýoldaşlyk duşuşygyny geçirjekdigini tassyklady. Bu barada Malaýziýanyň Futbol Assosiasiýasynyň resmi saýtynda habar berilýär.
Bellenilişi ýaly, Malaýziýanyň hem-de Türkmenistanyň milli ýygyndylaryň arasyndaky ýoldaşlyk oýny 2023-nji ýylyň 23-nji martynda Johor (Malaýziýa) ştatyndaky Soltan Ibragim adyndaky stadionda geçiriler. Duşuşygyň başlanjak wagty heniz mälim edilmedi.
Häzirki wagtda FIFA-nyň reýtinginde Malaýziýanyň milli ýygyndysy bolsa 145-nji ýerde barýar. Malaýziýanyň milli ýygyndysyna koreýaly hünärmen Kim Pan Gon tälim berýär.
Ýeri gelende ýatlatsak, Türkmenistan we Malaýziýa şu wagta çenli ýaşyl meýdançada diňe birje gezek duşuşdy. 2022-nji ýylyň 8-nji iýunynda Malaýziýanyň paýtagty Kuala-Lumpur şäherindäki «Bukit Jalil» stadionynda geçirilen oýun 3:1 hasabynda ýer eýeleriniň peýdasyna tamamlandy.
