18 ýaşly türkmen pälwany Alp Arslan Begenjow Bişkekde (Gyrgyzystan) geçirilen 20 ýaşa çenli türgenleriň arasynda Aziýanyň ýaşlar çempionatynda 79 kg agram derejesi boýunça bürünç medal gazandy.
Üçünji ýer üçin geçirilen duşuşykda türkmen pälwany Özbegistanyň wekili Jorullo Abdufattohowyň garşysyna çykyş edip, 12:1 hasabynda ynam bilen ýeňiş gazandy.
Ýaryşyň çärýek finalynda Begenjow Hindistanyň pälwany Amit Amit bilen duşuşdy. Türkmen türgeni tutluşygy ynam bilen alyp bardy we ikinji döwüň ahyryna çenli tehniki utuklar boýunça 6:3 hasabynda öňe çykmagy başardy. Şeýle-de bolsa, hindi türgeni 2-nji minutyň 47-nji sekundynda netijeli usul ulanyp, garşydaşyny eginleri bilen düşege degirip, tuşe, ýagny iki pilçäni ýere degirmäni gazandy. Utuklar boýunça artykmaçlygyň bardygyna garamazdan, Begenjow möhletden öň ýeňildi we final üçin göreşmek hukugyny ýitirdi.
Ozal şu ýylyň iýun aýynda Wýetnamda geçirilen 23 ýaşa çenli ýaşlaryň arasynda Aziýa çempionatynda Begenjow 79 kg agram derejesi boýunça kümüş medal gazanypdy.
Ýatlatsak, Alp Arslan Begenjow türkmen pälwanlarynyň taryhynda ilkinji gezek 20 ýaşa çenli türgenleriň arasynda erkin göreşde dünýäniň ýaşlar çempionatynda altyn medal gazanan pälwandyr. Ýaryş 2024-nji ýylyň sentýabr aýynda Ispaniýanyň Pontewedra şäherinde geçirilipdi.
turkmenportal
