2-nji iýunda S.A.Nyýazow adyndaky Türkmen oba hojalyk uniwersitetinde ýokary okuw mekdebiň professor-mugallymlar düzüminiň, aspirantlarynyň, ýaş alymlarynyň we talyplarynyň gatnaşmagynda ylmy-amaly maslahat geçirildi.
«Ekologiýa medeniýeti – durnukly ösüşiň esasy» atly forum Daşky gurşawy goramagyň bütindünýä gününe, Türkmenistanyň hemişelik Bitaraplygynyň 30 ýyllygyna hem-de Halkara parahatçylyk we ynanyşmak ýylyna bagyşlandy.
Umumy mejlisde ekologiýa abadançylygyny üpjün etmäge, ekologiýa medeniýetine hem-de ekologiýa biliminiň we ýokary okuw mekdeplerde talyplary terbiýelemegiň usulyýet aýratynlyklaryna, ýurduň ekologiýa abadançylygyny gazanmak ugrundaky halkara hyzmatdaşlyga, türkmen döwletiniň ekologiýa syýasatynyň esaslaryna bagyşlanylan çykyşlar diňlenildi.
Soňra maslahat «Ekologiýa syýasaty – durnukly ösüşiň girewi», «Ylymda, bilimde we ýaşlary terbiýelemekde ekologik mümkinçilikleriň orny», «Ekologiýa howpsuzlygynyň ýörelgeleri – döwrüň möhüm talaby», «Türkmenistanyň innowasion ösüşinde tebigy we takyk ylymlaryň orny» diýen bölümler boýunça işini dowam etdi.
Çykyşlarda ýurduň ekologiýa abadançylygyny üpjün etmekde milli bilim we ylym ulgamynyň eýeleýän uly orny hem-de giň mümkinçilikleri barada gürrüň edildi. Esasan, bu ugurda hünärmenleri taýýarlamagyň we ýokary okuw mekdeplerdäki ylmy-barlag işleriniň ähmiýeti nygtaldy.
Uniwersitetde, hususan-da, oba hojalygynyň ekologiýasy fakultetinde we ekologiýa kafedrasynda ylmy esasda daşky gurşawyň goralmagy bilen baglanyşykly wajyp meseleleriň netijeli öwrenilýändigi, şeýle hem bu ulgamda dürli hünärler boýunça ýokary derejeli hünärmenleriň taýýarlanylýandygy bellenildi.
Çykyşlarda nygtalyşy ýaly, Türkmenistanda ekologiýa, daşky gurşawy goramak, ekologiýa howpsuzlygyny üpjün etmek, tebigy serişdelerden rejeli peýdalanmak, olaryň tebigy ýagdaýyny saklamak we geljekki nesiller üçin baýlaşdyrmak meselelerine aýratyn üns berilýär. Bu ugurda döwletiň alyp barýan giň möçberli işleri «Türkmenistanyň Howanyň üýtgemegi boýunça milli strategiýasynda», «Türkmenistanyň 2021–2025-nji ýyllar üçin Milli tokaý maksatnamasynda», «Türkmenistanyň Aral boýunça 2021– 2025-nji ýyllar üçin milli maksatnamasynda» beýan edildi.
Çykyş edenler ekologiýa abadançylygyny üpjün etmek maksady bilen ýurduň çäklerinde bagy-bossanlyga büremek boýunça çäreleriň yzygiderli geçirilýändigini, Türkmenistanyň täsin tebigy baýlyklaryny goramaga we köpeltmäge aýratyn ähmiýet berilýändigini bellediler.
turkmenistan.gov.tm
