Wekilbazar etrabynyň Mollanepes adyndaky şäherçe medeniýet öýünde geçirilen «Iň eýjejik gyzjagaz-2025» atly şadyýan bäsleşigiň welaýat tapgyry kalby ylhamly, zehinlije gyzlary ýüze çykarmakda uly ähmiýete eýe boldy.
Milli Bahar baýramy mynasybetli Türkmenistanyň Bilim ministrliginiň hem-de Türkmenistanyň Magtymguly adyndaky Ýaşlar guramasynyň Merkezi Geňeşi bilen bilelikde ýurdumyzyň umumybilim berýän orta mekdepleriniň 2-4-nji synplarynda okaýan okuwçy gyzlaryň arasynda yglan eden «Iň eýjejik gyzjagaz-2025» atly şadyýan bäsleşigiň welaýat tapgyry geçirildi. TMÝG-niň Mary welaýat Geňeşi hem-de Mary welaýat Baş bilim müdirliginiň guramagynda geçirilen deslapky tapgyra gatnaşan gyzjagazlar bäsleşigiň şertlerine laýyklykda, aýdym aýtmakda, milli egin-eşiklerimizi geýip ony şahyrana sözler bilen wasp etmekde hem-de milli el işlerini ýerine ýetirmekde özleriniň ukyp we zehin başarnyklaryny ussatlyk bilen görkezdiler. Ýerine ýetirilen çykyşlar okuwçy gyzjagazlaryň ýokary taýýarlyk derejelerini äşgär etdi.
Gyzykly we çekeleşikli ýagdaýda geçen bäsleşikde I orna Türkmengala etrabynyň daşary ýurt dillerine ýöriteleşdirilen 1-nji orta mekdebiň 2-nji synp okuwçysy Melek Esenowa, II orna Wekilbazar etrabynyň 10-njy orta mekdebiniň 4-nji synp okuwçysy Zeýnepbibi Orazmyradowa dagylar mynasyp bolup, olar paýtagtymyzda geçiriljek jemleýji tapgyra gatnaşmaga hukuk gazandylar.
Bäsleşikde ýeňiji bolan eýjejiklere we işjeň gatnaşan şadyýan gyzjagazlara Türkmenistanyň Magtymguly adyndaky Ýaşlar guramasynyň Mary welaýat Geňeşiniň Hormat hatlary hem-de ýadygärlik sowgatlary dabaraly ýagdaýda gowşuryldy.
Aýjeren GELDIÝEWA,
Türkmenistanyň Magtymguly adyndaky
Ýaşlar guramasynyň Mary welaýat Geňeşiniň
Guramaçylyk bölüminiň müdiri,
Türkmenistanyň Ýaşlar baýragynyň eýesi.
