Bilim merdana halkymyzyň müňýyllyklaryň dowamynda döreden hem-de nesilden-nesle geçirip gelen iň gymmatly baýlygydyr, durmuş ýörelgesiniň, medeniýetiniň hem-de tejribesiniň gözbaşydyr. Berkarar döwletiň täze eýýamynyň Galkynyşy döwründe Arkadagly Serdarymyzyň taýsyz tagallalary netijesinde ýurdumyzda bilim ulgamyny kämilleşdirmekde, ösüp gelýän ýaş nesle dünýä ülňülerine laýyklykda durnukly bilim we döwrebap terbiýe bermekde tutumly işler alnyp barylýar. Çäksiz aladalar, bilim işgärleriniň jogapkärçiligini ýokarlandyryp, röwşen geljegimiziň eýeleri boljak ylymly-bilimli we watansöýüji ýaşlary kemala getirmäge borçly edýär. Şeýle borç duýgusyndan ugur alýan welaýatymyzyň bilim işgärleri hem ajap eýýamymyzyň mynasyp neslini kemala getirmekde ähli tagallalary edýärler.
Ýakynda, Mary şäherindäki ýöriteleşdirilen 28-nji orta mekdebinde welaýatyň mugallymlarynyň awgust maslahaty geçirildi. Oňa welaýat häkimliginiň ýolbaşçylary, jemgyýetçilik guramalarynyň wekilleri hem-de bilim işgärleri gatnaşdylar.
Maslahatda çagyrylan myhmanlar çykyş etdiler. Olar ýaş nesliň bilim alýan mukaddes bilim ojaklarynda alnyp barylýan işler dogrusynda giňişleýin durup geçdiler. Çykyşlarda Arkadagly Serdarymyzyň parasatly ýolbaşçylygynda ýurdumyzyň dürli künjeklerinde açylyp ulanylmaga berilýän, dünýä ülňülerine laýyk gelýän, kämil tehnologiýalar bilen üpjün edilen, giň we ýagty otagly ak mekdepleriň we çagalar baglarynyň sanynyň barha artmagy ýaşlar barada edilýän aladalaryň çäksizdigi barada buýsançly bellenildi. Aslynda, ýaş nesil hakynda edilýän şu günki alada bagtyýar ertirimiziň aladasydygy, munuň özi bolsa, mugallymyň päk zähmetiniň datly miwesiniň abadan geljegimiziň bilimli, terbiýeli, zähmetsöýer ýaşlarynyň kemala gelmeginde jemlenýändigi hakynda täsirli gürrüňler edildi.
Maslahatyň dowamynda geçen okuw ýylynda tapawutlanan mugallymlara we terbiýeçilere Mary welaýat Baş bilim müdirliginiň Hormat hatlary we jemgyýetçilik guramalarynyň ýadygärlik sowgatlary dabaraly ýagdaýda gowşuryldy.
Täsirli geçen maslahatyň ahyrynda, ýaş nesilleriň ylymly-bilimli we ösen tehnologiýalardan oňat baş çykarýan kämil şahsyýet bolup ýetişmegi ugrunda beýik başlangyçlary durmuşa geçirýän Gahryman Arkadagymyzyň hem-de peder ýoluny mynasyp dowam etdirýän Arkadagly Serdarymyzyň adyna alkyş sözleri aýdyldy.
Aýjeren GELDIÝEWA,
Türkmenistanyň Magtymguly adyndaky
Ýaşlar guramasynyň Mary welaýat Geňeşiniň
guramaçylyk bölüminiň baş hünärmeni.
