Asylly däplere eýermek watançylyk we millilik duýgusyny oýarýar. Türkmen halkynyň milli buýsanjy, gadymy gymmatlyklaryny çuňňur öwrenmek we ösdürmekde, medeni mirasymyza hormat goýmak, ýaşlaryň arasynda ýaýbaňlandyrylýar. Her bir halkyň medeni-mirasy, däp-dessurlary, onuň milligini kesgitleýän, nesilde-nesle geçip gelýän gymmatlyklary bolup, ol halkyň özboluşlylygyny şöhlelendirýär. Ýaş nesillerimizi millilik ruhunda terbiýelemek maksady bilen Türkmenistanyň Magtymguly adyndaky Ýaşlar guramasynyň Aşgabat şäher Geňeşiniň gurnamagynda 2023-nji ýyl “Arkadag Serdarly bagtyýar ýaşlar ýyly” mynasybetli halkymyzyň şöhraty taryhyna, dünýä medeniýetiniň ösüşini mynasyp goşant goşan milli medeni mirasymyza degişli gymmatlyklary ýaş nesillerde mukaddes topragymyza, eziz Watanymyza beýik söýgüni terbiýelemek maksady bilen Türkmenistanyň Döwlet Medeniýet merkeziniň Döwlet muzeýine talyp, okuwçy we zähmet çekýän ýaşlarymyzyň gatnaşmaklarynda “Medeni miras-halkyň ruhy dünýäsi” ady bilen gezelenç duşuşygy geçirildi.
Hormatly Prezidentimiziň alyp barýan içeri we daşary syýasatynyň esasy ugurlarynyň biri milli medeniýetimiz, sungatymyzy, taryhy we tebigy gymmatlyklarymyzy gorap saklamak, ösdürmek, döwrebap kämilleşdirmek hem-de olary tutuş adamzadyň genji-hazynasyna öwürmekden ybaratdyr. Hut şonuň üçin hem soňky ýyllarda ýurdumyzda birnäçe gymmatlyklarymyz ÝUNESKO-nyň Adamzadyň maddy däl medeni mirasynyň sanawyna girizildi.
Hemmämize mälim bolşy ýaly, ata-babalarymyz şöhratly taryhda ajaýyp sungat eserlerini döredipdirler. Umuman, pederlerimiziň durmuş tejribesi bilen baglylykda emele gelen we nusgawy gymmatlyga öwrülen köpöwüşgünli mirasymyz milli özboluşlylygyň binýadydyr. Halkymyzyň toplumlaýyn durmuş we medeni mirasyny dürli ylymlaryň nukdaýnazaryndan öwrenmek, özleşdirmek we baýlaşdyrmak ajaýyp döwrümiziň gülläp ösüşine gönükdirilen borjumyzdyr. Medeniýet-ynsanlara nähili ýaşamalydygyny öwredýän beýik mugallym. Sungat-barlygy manyly ýaşamagyň ýörelge-ýoly. Döredijilik-özgeleriň aňyny ösdürmäge özüňi bagyşlamak. Bularyň ählisi birleşip, ynsanyň içki dünýäsini baýlaşdyrýan, ruhy iýmit bolup hyzmat edýän kämil eserleriň döremegine esas bolýar. Hut şonuň üçin Gahryman Arkadagymyz medeniýeti halkyň kalbyna deňeýär. Milli senetlerimizi öwrenmek arkaly nesilleriň zähmet ukyplaryny kämilleşdirmek bolýar. Milli senetler hakyndaky düşünjeler bolsa olaryň watançylyk duýgularynyň has-da ösmegine oňyn täsirini ýetirýär. Şeýle bolansoň her bir milli senet, milli sungat nesil terbiýesinde möhüm orny eýeleýär.
Goý “Arkadag Serdarly Bagtyýar ýaşlar ýylynda” Berkarar döwleti peşgeş beren, Ýaş nesillerimizi millilik ruhunda terbiýelemekde ähli mümkinçilikleri döredip berýän Gahryman Arkadagymyzyň hem-de Hormatly Prezidentimiziň janlary sag, ömürleri uzak bolsun, beýik tutumlary hemişe rowaç alsyn!
Amanberdi ANNABERDIÝEW,
Türkmenistanyň Magtymguly adyndaky
Ýaşlar guramasynyň Aşgabat şäher
Geňeşiniň Medeniýet we köpçülikleýin
habar beriş bölüminiň müdiri.
