Golaýda ýurdumyzyň orta mekdepleriniň 3-5-nji synplarynda okaýan okuwçy oglanlaryň arasynda yglan edilen «Merdana nesil» atly bäsleşigi Ahal welaýatynyň Babadaýhan etrabynyň mekdep okuwçylarynyň arasynda hem uly meşhurlyga eýedir. Şoňa görä-de, etrabyň kiçi ýaşly okuwçy oglanlary şadyýan bäsleşige uly höwes bilen gatnaşýarlar.
Halkara parahatçylyk we ynanyşmak ýylynda ýurdumyzyň hemişelik Bitaraplygynyň şanly 30 ýyllygy mynasybetli yglan edilen «Merdana nesil — 2025» atly şadyýan bäsleşigiň etrap tapgyry gyzgalaňly geçdi. Etrabyň 19-njy orta mekdebiniň mejlisler jaýynda geçen bäsleşige özüniň göreldeli edebi, sapaklara ýokary derejede ýetişigi, bilimlere teşneligi, zähmetsöýerligi, ugurtapyjylygy bilen öňe saýlanan, sungata höwesli okuwçy oglanlar gatnaşyp, ukyp-başarnygyny görkezdiler.
Türkmenistanyň Magtymguly adyndaky Ýaşlar guramasynyň Babadaýhan etrap Geňeşiniň we etrap bilim bölüminiň bilelikde guramagynda geçen bäsleşik zehinli okuwçy oglanlary ýüze çykardy. Şeýlelikde, «Merdana nesil» atly şadyýan bäsleşikde etrabyň 11-nji orta mekdebiniň okuwçysy Orazmyrat Ylýasow hem-de 23-nji orta mekdebiniň okuwçysy Jeýhun Isaýew ýeňiji boldular hem-de welaýat tapgyryna gatnaşmaga hukuk gazandylar.
Akmyrat TOÝÇYÝEW,
Türkmenistanyň Magtymguly adyndaky Ýaşlar guramasynyň
Ahal welaýatynyň Babadaýhan etrap Geňeşiniň başlygy.
