Berkarar Diýarymyzda Birleşen Milletler Guramasynyň ýurdumyzda ýerleşýän hemişelik wekilhanalary bilen bilelikde sport, medeni, ekologik ulgamlary boýunça çäreler yzygiderli geçirilýär. Türkmenistanyň hemişelik Bitaraplyk hukuk derejesiniň ilkinji gezek ykrar edilmeginiň 30 ýyllygy we Birleşen Milletler Guramasynyň esaslandyrylmagynyň 80 ýyllygy mynasybetli BMG-niň Ösüş maksatnamasynyň Türkmenistandaky hemişelik wekilhanasynyň guramagynda mazmuny köpçülikleýin ylgaw ýaryşyndan, okuw maslahatyndan we iki taraplaýyn duşuşyklardan ybarat bolan giň möçberli çäreleriň biri Gündogar sebitiň merkezi Türkmenabat şäherinde geçirildi.
«Parahatçylyk we durnukly ösüşe batly gadam» diýlen at bilen geçirilen sport çäresine Türkmenistanyň Daşary işler ministrliginiň welaýat boýunça wekilhanasynyň işgärleri, syýasy partiýalaryň we jemgyýetçilik guramalarynyň wekilleri, türgenlerdir tälimçiler, bilim, medeniýet, saglygy goraýyş ulgamlarynyň işgärleri we meýletinçiler gatnaşdylar.
Köpçülikleýin ylgaw ýaryşyna gatnaşyjylar Türkmenabat şäherindäki Baş baýdak meýdançasyndan welaýatyň aýdymçy-sazandalarynyň şowhunly çykyşlary bilen badalga aldylar we Bitarap Türkmenistan köçesiniň ugry boýunça ýaryşy dowam etdiler. Ýaryşa gatnaşyjylaryň uzyn hatarlary ýurdumyzda köpçülikleýin bedenterbiýäni we sporty ösdürmek ugrundaky özgertmeleriň netijesinde sagdyn durmuş ýörelgelerine eýerýän ildeşlerimiziň sanynyň günsaýyn artýandygyny ýene bir gezek aýan etdi. Ýaryşda baýrakly orunlara dalaşgärleriň köp bolmaklygy onuň örän dartgynly we gyzykly geçmekligini üpjün etdi hem-de sebitde sportuň ýeňil atletika görnüşiniň uly meşhurlyga eýedigini görkezdi. Bäsleşikde bellenilen 5 kilometr aralygy ynam bilen geçip, pellehana ilkinji bolup gelen Türkmenabat şäheriniň ýaşaýjylary Gurtgeldi Gurdow erkekleriň arasynda, Nargiza Kadyrowa hem zenanlaryň arasynda ýeňiji boldular.
Köpçülikleýin ylgaw ýaryşynda ýetginjek oglanlaryň we gyzlaryň arasynda degişlilikde Farap etrabyndaky 14-nji orta mekdebiň okuwçylary Muhammet Durdymyradow hem-de Aziza Atahanowa pellehanadan ilkinji bolup geçmekligi başardylar. Bäsleşigiň ýeňijilerine we baýrakly orunlara mynasyp bolan türgenlere dabaraly ýagdaýda diplomlar we sowgatlar gowşuryldy. Bulardan başga-da bellenilen meýilnama boýunça Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýanyň, Ösüş maksatnamasynyň hemişelik wekiliniň orunbasarynyň hem-de beýleki jogapkär işgärleriniň Lebap welaýatynyň ýolbaşçylary bilen duşuşygy geçirildi.
Duşuşykda BMG-niň Ösüş maksatnamasy bilen Türkmenistanyň Daşky gurşawy goramak ministrliginiň bilelikdäki «Aral deňziniň basseýninde köptaraplaýyn amatlyklary döretmek maksady bilen ýokary tebigy gymmatlygy bolan ýer serişdelerini we ekoulgamy gorap saklamak we durnukly dolandyrmak» atly taslamasyny durmuşa geçirmek boýunça hyzmatdaşlyk etmek meseleleri ara alnyp maslahatlaşyldy.
turkmenistan.gov.tm
