Giň äleme şugla salýar ynsanperwer nury bilen,
Hemaýatdyr, howandardyr, haýyr-sahawat gaznasy.
Parahatlyk ýolun gurýar döwletleriň bary bilen,
Döwrümize beýik şandyr, haýyr-sahawat gaznasy.
Buýsanç bilen täç edinip beýik Arkadagyň adyn,
Gülledip ynam bagyny, gowşamasyn munda badyň,
Çagajyklaň dillerinde müdimilik sena, aýdym,
Zemin üzre berkeýändir, haýyr-sahawat gaznasy.
Toý-baýram kerwenin gurýar toýhana öwrüp Diýary,
«Saglyk-salamatlyk bolsun!» Gaznanyň beýik şygary,
Ganatyňda bagtly mydam dost-dogan çagalaň bary,
Ýüreklere ornaýandyr, haýyr-sahawat gaznasy.
Eçilip sowgat-salamy ýer ýüzüniň halklaryna,
Guýup ýagşylyk şygaryn adamlaryň kalplaryna,
Ynam bilen gadam urýar ertirleriň ak daňyna,
Niýetleri durlaýandyr, haýyr-sahawat gaznasy.
Pajarlaýar Arkadagly Serdarymyzyň saýasynda,
Haýyrly işe beslenen günleň hamyrmaýasynda,
Agzybirlik höküm sürýän gül zeminiň aýasynda
Baýdak bolup parlaýandyr, haýyr-sahawat gaznasy.
Çeper NAZARGYLYJOWA,
Döwletmämmet Azady adyndaky
Türkmen milli dünýä dilleri institutynyň magistranty,
TMÝG-niň işjeň agzasy.
