Golaýda «Magtymguly Pyragynyň döredijiligi-ýaş nesilleri terbiýelemekde bahasyna ýetip bolmajak bilim çeşmesidir» diýen şygar bilen Türkmenistanyň Magtymguly adyndaky Ýaşlar guramasynyň Mary welaýatynyň Wekilbazar etrap Geňeşiniň gurnamagynda wagyz-nesihat duşuşygy geçirildi. Wekilbazar etrabynyň 2-nji orta mekdebinde guralan duşuşyga Ýaşlar guramasynyň ýerli Geňeşiniň işgärleri we ady agzalan orta mekdebiň okuwçylary gatnaşdylar.
Duşuşyga gatnaşanlar Arkadagly Gahryman Serdarymyzyň parasatly baştutanlygynda «Pähim-paýhas ummany Magtymguly Pyragy» ýylynda akyldar şahyr Magtymguly Pyragynyň döredijiligini we şahsyýetini öwrenmekde amala aşyrylýan işler dogrusynda buýsançly çykyş etdiler. Şunuň bilen baglylykda, beýik söz ussady Magtymguly Pyragynyň döredijiliginiň dünýä dolan şöhratyny giňden wagyz etmek we bu ugurda halkara hyzmatdaşlygyny pugtalandyrmak boýunça Magtymguly Pyragynyň golýazmalar toplumynyň ÝUNESKO-nyň «Dünýäniň hakydasy» maksatnamasynyň halkara sanawyna girizilendigine aýratyn üns çekildi.
Duşuşygyň dowamynda Gahryman Arkadagymyzyň «Pähim-paýhas ummany Magtymguly Pyragy» atly ajaýyp goşgusy uly buýsanç bilen okalyp, akyldar şahyryň baý edebi mirasyny öwrenmekde giň mümkinçilikleri döredip berýän Gahryman Arkadagymyzyň hem-de Arkadagly Gahryman Serdarymyzyň adyna alkyş sözleri aýdyldy.
Döwlet BAÝRAMOW,
TMÝG-niň Mary welaýatynyň Wekilbazar etrap
Geňeşiniň Guramaçylyk bölüminiň müdiri.
