Şanly Garaşsyzlygymyzyň 32 ýyllygynyň ýetip gelýän günlerinde ýurdumyzyň baş baýramy mynasybetli toý-dabaralar giňden ýaýbaňlandyrylýar. Şol baýramçylyk dabaralarynda ýurt Garaşsyzlygymyzyň buýsançly waspy belentden ýaňlanýar. Ýaşlarymyz ýurdumyzyň bu baş baýramyna sowgatly barmak hyjuwy bilen joşup, yhlasly okap, zähmet çekip, döwrümiziň sesine mynasyp ses goşýarlar.
Hut şu nukdaýnazardan, golaýda Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşiniň hem-de etrap bilim bölüminiň bilelikde guramagynda etrabyň 35-nji orta mekdebinde surat çekmek boýunça döredijilik bäsleşigi geçirildi. Şanly Garaşsyzlygymyzyň 32 ýyllyk baýramyny mynasyp garşylamak, ýaşlaryň döredijilik ukybyny ýokarlandyrmak hem-de zehin-başarnyklaryny açyp görkezmek maksady bilen geçirilen bäsleşige şol mekdebiň surat çekmek bilen meşgullanýan okuwçy oglan-gyzlarynyň birnäçesi gatnaşdylar.
«Garaşsyz Watanym dillerde dessan» ady bilen geçirilen surat bäsleşiginde okuwçy ýaşlar özleriniň zehin hem-de ukyp başarnyklaryny görkezdiler. Bäsleşigiň şertlerine laýyklykda oňa gatnaşan ýaş suratkeşler özleriniň hödürlän işlerinde ata Watanymyzyň Garaşsyzlyk ýyllary içinde gazanan ösüşlerini, bagtyýar çagalygy we ajaýyp tebigatymyzy wasp etdiler. Bäsleşige hödürlenen suratlar mekdebiň döredijilik burçunda guralan sergide görkezildi.
Döredijilik bäsleşigine hödürlenen işleriň ählisi, ýörite düzülen eminler toparynyň garamagynda seljerme işleri geçirilip, olaryň biragyzdan gelen netijelerine laýyklykda, zehinli suratkeşler yglan edildi. Bäsleşigiň ýeňijilerine Türkmenistanyň Magtymguly adyndaky Ýaşlar guramasynyň Mary welaýatynyň Sakarçäge etrap Geňeşi tarapyndan Hormat hatlary gowşuryldy.
Baýramçylyk äheňinde geçirilen döredijilik bäsleşiginiň dowamynda ýaş nesilleriň ylymly-bilimli we kämil şahsyýetler bolup ýetişmegi ugrunda beýik başlangyçlary durmuşa geçirýän Gahryman Arkadagymyzyň hem-de Arkadagly Serdarymyzyň adyna tükeniksiz alkyş sözlerini aýtdylar.
Jennet ŞIRIÝEWA,
TMÝG-niň Mary welaýatynyň Sakarçäge etrap Geňeşiniň
Guramaçylyk bölüminiň esasy hünärmeni.
