Ýurdumyzda edermen babadaýhanlarymyzyň çekýän zähmetine belent sarpa goýlup, her ýylyň noýabr aýynyň ikinji ýekşenbesinde Hasyl toýy uludan bellenilýär. Bu baýramçylyga bagyşlanyp ýurdumyzyň ähli sebitlerinde geçirilýän çäreler giň gerime eýe bolýar.
Şunuň bilen baglylykda, bu şanly senä bagyşlanyp, Mary şäheriniň 24-nji çagalar bakja-bagynda zehin bäsleşigi geçirildi. Türkmenistanyň Magtymguly adyndaky Ýaşlar guramasynyň Mary welaýatynyň Mary şäher Geňeşiniň, şäheriň 24-nji çagalar bakja-bagy bilen bilelikde guramagynda geçirilen bäsleşik «Hasyl toýy-berekediň baýramy» diýlip atlandyrylyp, oňa şol çagalar bagda terbiýelenýän kiçi ýaşly körpeler gatnaşdylar.
Bäsleşigiň esasy maksady Hasyl toýy mynasyp garşylamakdan we çagalaryň ünsüni, ýatkeşligini, pikirlenmek ukybyny ösdürmekden we zehinli körpeleri ýüze çykarmakdan ybarat boldy.
Işjeň häsiýetde geçen bäsleşikde körpeler ýurdumyzda azyk bolçulygyndan kemala gelen miweleri, gök önümlerden tapawutlandyrmakda we olaryň atlaryny dogry aýtmakda bäsleşdiler. Olaryň bu başarnygy, körpe nesillerde ilkinji düşünjeleriň kemala gelmegini ýola goýmagyň entek çagalyk döwründen başlanýandygynyň aýdyň subutnamasy boldy. Bäsleşikde üstünlikli çykyş eden körpelere Türkmenistanyň Magtymguly adyndaky Ýaşlar guramasynyň Mary welaýatynyň Mary şäher Geňeşi tarapyndan Hormat hatlary gowşuryldy. Topar otagynda döredilen tebigat we gök-önümler burçy bolsa, çäräniň täsirliligini has-da artdyrdy.
Bäsleşigiň ahyrynda oňa gatnaşanlaryň her biri asuda ýurdumyzda körpe nesilleriň döredijilik bilen meşgullanmagyna giň mümkinçilikleri döredip berýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Altyn BAÝLYÝEWA,
Mary welaýatynyň Mary şäheriniň
24-nji çagalar bakja-bagynyň terbiýeçisi,
TMÝG-niň işjeň agzasy.
