Futbol boýunça Türkmenistanyň çempionatynyň 22-nji tapgyrynyň yza süýşürilen duşuşygynda «Altyn asyr» toparynyň futbolçylary «Aşgabat» toparyny 5:0 hasaby bilen ýeňip, üstünlik gazandylar.
«Aşgabat» topary şertli meýdança eýesi hökmünde çykyş eden bolsa-da, duşuşyk «Altyn Asyr» toparynyň adatça öý duşuşyklaryny geçirýän Büzmeýin etrabyndaky «Sport toplumy» stadionynda geçirildi.
Bu duşuşykdan öň garşydaş taraplar milli çempionatda üç gezek duşuşdylar. Şol duşuşyklaryň ikisinde «Altyn asyr» topary 1:0 we 2:1 hasabynda ýeňiş gazandy, «Aşgabat» topary bolsa diňe bir gezek öz meýdançasynda 3:1 hasaby bilen ýeňiş gazandy.
Dördünji duşuşykda bolsa «Aşgabat» topary 2018-nji ýylyň AFK-nyň kubogynyň finalçysyna garşy göreşip bilmedi, onuň derwezesine birinji ýarymda bir, ikinji ýarymda bolsa dört pökgi girdi.
Aragatnaşyk ministrliginiň toparynyň düzüminde duşuşygyň gahrymany Myrat Annaýew boldy, ol 38-nji, 76-njy we 87-nji minutlarda üç gol geçirdi. Şeýle hem Rahman Myratberdiýew (47-nji minutda) we Röwşengeldi Halmämmedow (84-nji minutda) bir pökgi geçirip tapawutlandylar.
Balkanabadyň «Nebitçi» topary bilen geçirilen öňki duşuşykda Myrat Annaýewiň iki gezek gol salyp, indi bolsa üç gol geçirip, häzirki çempionatdaky gollarynyň sanynyň 7-ä ýetendigini bellemelidiris. «Köpetdag» toparynyň hüjümçisi Daýanç Meredowyň hasaby hem 7 pökgä deňdir. «Şagadam» toparyndan Mekan Aşyrow 8 gol (1 — jerime urgusyndan), «Arkadag» toparyndan Şamämmet Hydyrow 9 gol (1 — jerime urgusyndan), Altymyrat Annadurdyýew 16 gol (1 — jerime urgusyndan), Begenç Akmämmedow bolsa 17 gol (1 — jerime urgusyndan) bilen öňde barýarlar. Iň köp pökgi geçirenleriň arasynda bolsa soňky iki çempionatyň iň gowy hüjümçisi, «Arkadag» toparynyň futbolçysy Didar Durdyýew 20 gol (1 — jerime urgusyndan) bilen öňdeligi saklaýar.
Bu ýeňişden soň «Altyn asyr» topary 40 utuk bilen ýaryş sanawynda ikinji orunda ýerleşip, öňdebaryjy «Arkadag» toparyndan 23 utuk bilen yzda galýar, emma öňdebaryjy toparyň bir duşuşygy kem.
turkmenistan.gov.tm
