Türkmenistanyň halkara giňişlikdäki daşary syýasy üstünlikleri hem-de netijeli hyzmatdaşlygy ýurdumyzyň oňyn tejribesine ilkinji nobatda, Bitaraplyga we öňüni alyş diplomatiýasyna bolan gyzyklanmalaryň ýokarlanmagyna getirdi. Türkmeniň aň-düşünjesine şanly Garaşsyzlyk, baky Bitaraplyk hemişelik ornady. Şonuň üçinem bir agza bakýan türkmen şanly Garaşsyzlykdan soňra milletimiziň gazanan ýene bir arzyly binýady baky Bitaraplyk diýip hasap edýär. Halkymyz Halkara Birleşigine goşulmagyň tyllaýy açarynyň parahatçylyk söýüjilikden, asudalykdan, milletiň arasynda ynam köprisini berk gurnamakdan, ysnyşmakdan emele gelýändigine birkemsiz göz ýetirdi. Özüniň hoşniýetli häsiýetlerine ata-baba wepalylygyny iş ýüzünde subut etdi. Bitaraplyk derejesini almagymyza-da giň ýol açdy.1995-nji ýylyň dekabr aýynyň 12-sinde 185 döwletiň ses bermegi bilen, Garaşsyz döwletimize Bitaraplyk derejesi berildi. Şonuň üçinem biz bu günki bagtyýar zamanamyzda: “Dünýä Birleşen Milletler Guramasy tarapyndan ykrar edilen ilkinji Bitarap döwlet – bu biziň ata Watanymyz eziz Türkmenistandyr!” diýip seslenýäris. 12-nji dekabryň bütin dünýäde «Halkara Bitaraplyk» güni hökmünde giňden bellenilmegi ýurdumyzyň halkara abraýyny ýene-de bir gez beýgeltdi. Çünki biziň ata Watanymyz - eziz Türkmenistan Birleşen Milletler Guramasy tarapyndan ykrar edilen Bitarap döwletdir. Bu gün türkmen topragynda baky Bitaraplygyň 27 ýyllyk toýy uly dabara bilen bellenilýär. Bitaraplygymyzyň 27 ýyllyk toýy mynasybetli Türkmenistanyň Magtymguly adyndaky Ýaşlar guramasynyň Aşgabat şäheriniň Köpetdag etrap Geňeşi tarapyndan birnäçe medeni-köpçülikleýin baýramçylyk çäreleri bellenip geçilýär. Ine, şol çäreleriň biri hem Aşgabat şäheriniň Köpetdag etrap häkimliginiň mejlisler zalynda Türkmenistanyň Magtymguly adyndaky Ýaşlar guramasynyň Aşgabat şäheriniň Köpetdag etrap Geňeşiniň gurnamagynda “Bitaraplyk ösüşleriň özeni” ady bilen wagyz-nesihat duşuşygy geçirildi.
Ogulbibi MESKUTOWA,
TMÝG-niň Aşgabat şäheriniň
Köpetdag etrap Geňeşiniň sanly
ulgam boýunça esasy hünärmeni.
