Halkara Parahatçylyk we ynanyşmak ýylynda Türkmenistanyň Magtymguly adyndaky Ýaşlar Guramasy ýaşlara täze mümkinçilikleri açdy. Şu möhüm ýylyň çäginde mekdep okuwçylarynyň, talyplaryň we ýaş mugallymlaryň dil başarnyk ukyplaryny ösdürmäge gönükdirilen «Ýaş Dilmaçlar we Halypalar» atly täsin okuw taslamasy başlandy.
«Ýaş Dilmaçlar we Halypalar» taslamasy ýaşlara iňlis dili boýunça öz başarnyklaryny kämilleşdirmek üçin täsin mümkinçilikleri hödürleýär. Adaty sapaklardan tapawutlylykda, bu ýerde gatnaşyjylar diňe diňleýji bolman, eýsem çykyşlar bilen çykyş edip hem-de tematik diskussiýalara ýolbaşçylyk edip, aktiw gatnaşyjylara öwrülýärler.
Taslamanyň esasy aýratynlyklarynyň biri – gatnaşyjylara diňe bir öwrenmek däl, eýsem özbaşdak guramaçy we moderator bolmaga mümkinçilik döretmegidir. Maslahat berilýän mowzuklar durnukly ösüşiň global meselelerinden başlap, halkara hyzmatdaşlygynyň medeni we ylmy ugurlaryna çenli giň gerime eýedir. Bu çemeleşme tankydy pikirlenmäni, çykyş etmek başarnygyny we öz-özüňe ynamy ösdürmäge ýardam edýär.
Dil başarnyklaryny kämilleşdirmek bilen bir hatarda, taslama nesilleriň arasyndaky baglanyşygy berkitmäge hem gönükdirilendir. Tejribeli mugallymlar we bilermenler ýaşlara öz mümkinçiliklerini açmaga kömek edýärler hem-de bilimleri we tejribeleri bilen paýlaşýarlar.
«Ýaş Dilmaçlar we Halypalar» başlangyjy Türkmenistanyň ýaşlarynyň halkara dialogyna işjeň gatnaşýandygyny hem-de parahatçylyk we ynam ideýalaryny öňe sürýändigini görkezýär. Bu taslama ýaşlaryň iňlis dilini öwrenmek başarnyklaryny ýokarlandyrmak bilen çäklenmän, eýsem olaryň liderlik ukyplaryny ösdürmeklerine hem mümkinçilik berýär. Munuň özi işjeň we bilimli raýat jemgyýetini kemala getirmegiň möhüm ädimleriniň biridir. «Ýaş Dilmaçlar we Halypalar» taslamasyna goşulyň we täze mümkinçiliklere taýýar bolan ylhamly ýaş liderleriň jemgyýetiniň bir bölegi boluň!
Dawud DÖWLETOW
S.A.Nyýazow adyndaky Türkmen oba
hojalyk uniwersitetiniň talyby.
